«Roma» klubi fevral oyi yakunlariga ko‘ra, oyning eng yaxshi futbolchisi nomi uchun nomzodlar ro‘yxatini e’lon qildi.

Unga ko‘ra, Eldor Shomurodov ilk bor Rim klubida oy futbolchisi deb topilishi mumkin. O‘zbekistonlik hujumchi klub rasmiy saytidagi ovoz berish jarayonida hozircha 5 nomzod orasida Anxelino va Dibaladan keyingi 3-o‘rinda bormoqda. Ovoz berish 28 fevralga qadar davom etadi.

Eldor A Seriya 26-turida «Monsa»ga qarshi bahsda gol va assist qayd etib, tur ramziy jamoasidan o‘rin oldi. O‘zbek hujumchisi ketma-ket o‘yinlarda asosiy tarkibda maydonga tushmoqda.

Qayd etish joiz, «Roma» klubi matbuot xizmati ovoz berish jarayonini biroz murakkablashtirgan bo‘lib, ovoz berish uchun saytga kirib ro‘yxatdan o‘tishingiz talab etiladi va so‘ng so‘rovnomada ovoz berishingiz mumkin.

Ma’lumot uchun, Eldor Rim klubidagi 4 yillik faoliyati davomida ilk bor oyning eng yaxshi futbolchisi bo‘lishi mumkin.