La Liga o‘yinni AQSHda o‘tkazishdan bosh tortdi.

Ispaniya chempionatining 18-turidan o‘rin olgan «Barselona» – «Atletiko» bahsi Mayamida o‘tkazilishi rejalashtirilgan edi. Ammo Diario Sport xabariga ko‘ra, liga bu fikrdan voz kechdi, bellashuv Kataloniya poytaxtida bo‘lib o‘tadi.

Bunday qarorning sabablaridan biri yaqinda Ispaniyada sodir bo‘lgan suv toshqini bilan bog‘liq. La Liga prezidenti Xaviyer Tebasning fikricha, hozir AQSHda o‘yin o‘tkazish vaqti emas.

Rejalarni bekor qilishning yana bir sababi hozirda doimiy prezidentiga ega bo‘lmagan Ispaniya Qirollik futbol federatsiyasidagi vaziyatdir. Aynan shu tashkilot o‘yinni mamlakatdan tashqarida o‘tkazishni ma’qullashi kerak, ammo hozir uni vaqtincha direktorlar kengashi boshqaryapti.

La Liga rahbariyati o‘yinni 2025 yilda AQSHda o‘tkazish imkoniyatini istisno qilmayapti.

Ta’kidlanishicha, Ispaniya chempionati o‘yinini AQSHda o‘tkazish g‘oyasi uchinchi bor barbod bo‘ldi: 2019 yilda «Jirona» – «Barselona» va «Vilyarreal» – «Atletiko» o‘yinlarini xorijda o‘tkazish ham bekor qilingandi.

«Barsa» Mayamidagi o‘yindan taxminan 6 mln yevro ishlab olishni kutgan va muxlislar uchun charter reyslarini tashkil etish bo‘yicha muzokaralar olib borayotandi.