«Manchester Yunayted» bosh murabbiyi Erik ten Hag APL 9-turidan o‘rin olgan «Vest Hem» (1:2) bilan o‘yindan keyin o‘z fikrlarini bildirdi.

«Futbolda doim ham eng yaxshi jamoa g‘alaba qozonavermaydi. Bugun biz raqibdan ancha yaxshi o‘ynadik va imkoniyatlarimizdan foydalana olmadik, hakam esa juda noto‘g‘ri qaror qabul qildi — maydonda ham, uning tashqarisida ham.

O‘ylaymanki, biz juda yaxshi o‘ynadik. 60-daqiqagacha jamoamizni
tomosha qilish juda yoqimli edi. O‘yinimiz dinamik, o‘zgaruvchan, kreativ edi, ko‘plab vaziyatlar yaratdik. Bizga yetishmayotgan narsa — «qotillik».

Mavsum oldidan bizga VAR jarayoni qanday tashkil etilishi haqida ko‘rsatma berilgandi: u yaqqol xatodagina aralashadi. Bu safar aniq xatolik yo‘q, shuning uchun VAR aralashmasligi kerak edi. Ular Brununing qizil kartochkasiga aralashishlari kerak bo‘lgan «Tottenhem»ga qarshi o‘yinda buni qilishmadi, bu noto‘g‘ri qaror edi va endi ular bizga qarshi vaziyatdan aralashish orqali yana bir yomon qaror qabul qilishdi. Ikkala qaror ham o‘yin hisobiga sezilarli ta’sir ko‘rsatdi.

Aytganimdek, men shaxsan kimnidir emas, balki jarayonning o‘zini tanqid qilyapman. Maykl Oliver VAR tizimiga mas’ul edi, lekin maydondagi hakam qaror qabul qilishi kerak va u 3 daqiqa davomida takrorni kuzatdi. Shubhasiz, shunchalik uzoq ko‘rishdan so‘ng epizodning o‘yinga ta’sirini hisobga olsak, penalti belgilashdan o‘zini tiyishi kerak edi.

Hakamlar bilan gaplashdim, lekin qaror allaqachon qabul qilingan, ortga qaytish yo‘q, bu futbol. Bu mavsumda uchinchi marta adolatsizlikni his qilyapman. Bu jamoaga va natijalarimga, shuningdek, jadvaldagi o‘rnimizga katta ta’sir ko‘rsatmoqda. Bu noto‘g‘ri», — deya niderlandiyalik mutaxassisning so‘zlarini keltiradi MEN.

Eslatib o‘tamiz, 87-daqiqada mankunianliklar himoyachisi Matteys de Ligt jarima maydonchasi ichida Denni Ingz bilan to‘qnashib ketdi. Avvaliga bosh hakam Devid Kut qoida buzilishini ko‘rmadi, biroq videoassistentning maslahatidan so‘ng takrorni tomosha qilish uchun ketdi. Vaziyatni ko‘rib chiqish jarayoni taxminan ikki daqiqa davom etdi, shundan so‘ng hakam penalti belgiladi. Jarredd Bouen esa g‘alaba to‘pini kiritdi.