Fransiya milliy jamoasi hujumchisi Antuan Grizmann xalqaro faoliyatini yakunlagani haqida e’lon qildi.

Madridning «Atletiko» klubi hujumchisi Fransiya milliy jamoasida boshqa to‘p surmaydi. U bu masalada yakuniy qarorni qabul qilganini aytgan.

«Hayotimning ajoyib sahifasini yopdim. Barcha yorqin xotiralar va sarguzashtlar uchun rahmat», deya yozadi Antuan ijtimoiy tarmoqlardagi sahifasida.

33 yoshli Grizmann faoliyati davomida Fransiya milliy jamoasi safida 137 o‘yinda maydonga tushib, 44ta golga mualliflik qilgan. U fransuzlar safida 2018 yil jahon chempioniga aylangandi. Antuan milliy jamoa tarixida o‘yinlar soni bo‘yicha Jiru bilan birga 3-o‘rinni band etib turibdi.