«Qizilqum» himoyachisi Islom To‘xtaxo‘jayev faoliyati davomida ikkinchi bor legionerga aylandi.

Ikki mavsumdan buyon Superliga ishtirokchisi «Qizilqum» klubi safida to‘p surib kelayotgan 32 yoshli himoyachi Qatarning «Al-G‘arafa» klubi a’zosiga aylandi.

O‘zbekiston milliy jamoasi sobiq himoyachisi qatarliklar bilan bir yillik shartnomaga imzo chekkan. «Al-G‘arafa» o‘tgan mavsum Qatar Yulduzlar ligasida 5-o‘rinni egallagan.

Eslatib o‘tamiz, Islom hozirga qadar «Neftchi», «Lokomotiv» va «Qizilqum» klubi sharafini himoya qilgan. Legioner sifatida 2020 yil Xitoyning «Shenyang Urban» klubiga o‘tib, koronavirus pandemiyasi sababli ortga qaytgan edi.